Umrhanelwa oneminyaka engamashumi amathathu anesibini ubudala kulindeleke avele enkundleni yamatyala eMthatha kuleveki ngetyala lokuphanga isithuthi esiphatha imali,ukufunyanwa nompu ongekho mthethweni neembumbulu.Lo mrhanelwa ubanjwe ngamapolisa amacandelo aquka iProvincial Cash-In-Transit task team,Madeira SAPS,Tactical Response Team kunye neMthatha Local Criminal Record Centre.Ubanjwe ngoLwesihlanu weveki ephelileyo,kumbindi wedolophu yaseMthatha.
Ingxelo yamapolisa idize ukuba oonogada bakwaFidelity Solution bebegcwalisa umtshini wemali –ATM (Automated Teller Machine) kwisitalato iElliot kumbindi wedolophu.Ngesaquphe kuthe vumbu-gqi amadoda amathathu azenza abathengi,suka akhomba oonogada ngemipu.Abayalela ukuba balale phantsi ngezisu.Abanqevu bathathe imipu yoonogada nesixa mali esingachzwanga.Omnye unogada ufumene ukonzakala entloko wabalekiswa esibhedlele.Kwangoko kubikelwe amapolisa alanda ekhondweni.
UWarrant Officer Ndiphiwe Mhlakuvana othethela iHawks uthi ngethuba efika amapolisa afanise abarhanelwa ekuvakala ukuba bakhwele kwisithuthi esiluhlobo lwe-Ford Everest egrayi ngombala bawunyathela watshona umcephe.Ingxelo ithi ibalekele kwicala laseCircus Triangle ishiya ngasemva umrhanelwa obaleke ngeenyawo.UWarrant Officer Mhlakuvana uthi amapolisa aqhumise uthuli emva kwakhe aze amnqakula kwisitalato iEagle apho afunyenwe nemipu emibini eluhlobo lwe-9mm pistol Astra and Vector ikhuhlwe iinombolo neembumbulu.Uphando lokuqala lunxulumanisa umrhanelwa nolunye uphango lwezithuthi eziphatha imali ephondweni.
