UCeba womasipala iLundini phantsi kweJoe Gqabi eMpuma Kapa uAnele Phylious Mayisha (44) uvele phambi kwendkundla yamatyala ekhathekileyo yezezimali eMthatha kwiveki ephelileyo kulandela ukunqakulwa ngooKhetshe baseBizana.Kutyholwa ukuba ngonyaka ka-2014 ixhoba eliphazamisekileyo ngokwasengqondweni lalikhwele kwitrektha eyayisuka kuthatha iipali ehlathini.Ingxelo ithi ngesaquphe yathi yabhukuqa laze ixhoba lonzakala ngokumasikizi,ntoleyo yakhokhelela ukuba liqhawulwe umlenze.
Ingxelo idiza ukuba ngonyaka ofanayo umrhanelwa waya kwixhoba wacela ukulincedisa lifake ibango kwingxowa-mali yengozi zendlela u-RAF (Road Accident Fund).Iqhuba ithi umrhanelwa wathumela ixhoba kumagqwetha athile azinze eMthatha ukuze amncedise afake ibango.Isithethi seHawks ephondweni uWarrant Officer Ndiphiwe Mhlakuvana uthi ngomhla we-21 kwinyanga yoKwindla 2021,ummangali ongubhuti wexhoba eliphazamisekileyo waye wanesikrokro ngethuba efumana iinkcukacha ezisuka emagqwetheni zisithi u-RAF wabhatala imali kwiakhawunti yebhanki yexhoba.Kudizwa ukuba ofake isikhalazo egameni lexhoba wavula ityala lesimangalo kwisikhululo samapolisa sakwaBhaca.Le nyewe yadluliselwa kwiHawks ukuba ziqhube uphando.
UWarrant Officer Mhlakuvana uthi ooKhetshe bafumene ukuba lo ceba wathatha ikhadi lebhanki nepin yexhoba wazithumelela imali esisigidi serandi (R1 million) kwiakhawunti yakhe.Uphando lubhence ukuba ixhoba lalihlawulwe imali eqabele ngaphaya kwe-R1.5 yesigidi;ntoleyo yabangela lityelwe imali efikelela kwisigidi serandi nguloceba.Umrhanelwa ukhululwe ngebheyile ye-R5000 ityala limiselwe uLwesine waleveki ukuba afumane igqwetha.
