Yintatheli yeKhwezi
Amalungu ePublic Assets Community based Tenants and Owners Association (PACTOA) ayalelwe ibheyile ityeli lesithathu yinkundla kaMantyi eMthatha.La malungu abevele emaplangeni kwiveki esisuka kuyo nguSicelo Nkqayi (49),uZamikhaya Songca (39) kunye noBongani Cikolo (44) nabathi babanjwa kuOkthobha wonyaka ophelileyo ngezityholo zokurhwaphiliza izindlu zikarhulumente.
Kuvakala ukuba ukusukela ngoAgasti ka-2017 kunye noSeptemba ka-2022 bathi baqalisa ukurhwaphiliza izindlu zika-ECDC (Easterc Cape Dvelopment Corporation) baze baqeshisa ngazo benza imali engaphaya kwama R40 ezigidi.Kanti inkampani yekontileka kaNkqayi iStengo Construction ixutywe kuluhlu lwabamangalelwa nanjengoko kuvakala okokuba yayisetyenziswa kakhulu ukungena kwemali esuka kwiDyunivesithi yaseWalter Sisulu nebihlalisa abafundi kwezinye zezi zakhiwo.Baya kubuyela eNkundleni ngomhla wesine kuDisemba ukuqalisa ukuxoxwa kwetyala.
